Minisiteri y’Ubuzima mu Rwanda yatangaje ko ku wa Kane tariki 21 Mutarama 2021, mu Rwanda abantu icyenda bitabye Imana bishwe na COVID-19. Nibo benshi ihitanye mu munsi umwe kuva yagera mu Rwanda muri Werurwe 2020.
Abishwe na COVID-19 ku wa Kane ni abagore bane b’imyaka 80 i Karongi, 61, 43 na 32 i Kigali n’abagabo batanu b’imyaka 86 i Huye, 75, 73, 72 i Kigali n’umugabo w’imyaka 58 i Rubavu.Bahise buzuza umubare w’abantu 162 bamaze kwicwa n’iki cyorezo.
Minisiteri y’Ubuzima kandi yatangaje ko ku wa Kane mu Rwanda habonetse abantu bashya 310 banduye COVID-19, naho 161 mu bari barwaye bakize.
Kuri uyu wa Kane tariki 21 Mutarama 2021 abanduye bashya ni 310, ni ku nshuro ya kabiri handuye abantu barenga 300 kuko ku wa Gatatu tariki 20 Mutarama na bwo handuye 312.
Abanduye ni ab’i Kigali 85, Gatsibo 57, Ngoma 41, Gicumbi 27, Huye 18, Rulindo 11, Karongi 11, Musanze 10, Nyagatare 9, Gisagara 7, Nyanza 6, Kirehe 6, Burera 5, Rubavu 5, Muhanga 3, Rusizi 2, Kamonyi 2, Nyamagabe 2, Ruhango 2, na Nyamasheke 1.
Kugeza ku wa Kane, mu Rwanda abari bamaze kwandura icyo cyorezo ni 12.170 muri bo abamaze gukira ni 7.973 naho abakivurwa ni 4.035.
Hashize iminsi 3 u Rwanda rushyize muri Guma mu Rugo abatuye Umujyi wa Kigali, ndetse runafunze amashuri yo muri Kigali kuva ku y’incuke kugera kuri Kaminuza.
